أثار رأى الناقد الفني طارق الشناوي في مصطفى قمر وفيلمه الجديد "أولاد حريم كريم" خلال لقاء طارق بــET بالعربي، جدل كبير عبر السوشيال ميديا، عندما قال أن الفيلم لا علاقة به بصناعة السينما في الوقت الحالي، وأن مصطفى قمر لا يجدد من نفسه.
ليرد عليه مصطفى قمر خلال بوست نشره على انستقرام: "هو انا مش طلبت منك تبعد عني اصلا وماتتكلمش عني علشان ماتتهزأش.. طيب انت اللي جيبته لنفسك. عموما ياللي اسمك طارق انت كاتب كلام اهبل يدل للمرة المليون انك ماشفتش الفيلم، وعموما اللي حيرد عليك جمهور السينما الحقيقي اللي دخل الفيلم، اللي مالوش دعوة بالنفاق او مصلحة اي حد تاني (فكرني كدة شغلتك ايه….؟…. هي من اريع حروف بيتهيألي".
كما ردت بشرى منتجة الفيلم على الناقد طارق الشناوي وقالت: "أنا اسفة يا مصطفى.. لكن أنا شايفة إن كل واحد حر فى رأيه، والرأى لا يمثل إلا صاحب الرأى، لكن الجمهور شأن آخر، و الغالبية قد قالت كلمتها، ورأى واحد سلبى و غير موضوعى امام آلاف الإشادات فى قاموس النسبة و التناسب يساوى ١ فى الألف أو المليون، و دى نسبة لا تُذكر".
ودافعت بشرى عن اتهامات طارق الشناوي لقمر بعد التجديد قائلة: "ثم لو الأستاذ طارق شايف إن حضرتك قديم واحنا كلنا ١٢ بطل و بطلة من الجيلين كلنا قدام هو حر ...مع إنك يا أخى من أكتر النجوم معاصرة و تجديد، ومن أول من أحدث تطوير فى الاغنية المصورة و اغانيك بتتعلب فى كل مكان و محفوظة من كل الاجيال و الغالب مستمر ف اسمحلى اقولك يا مصطفى احنا نسيب كل جديد و حديث للاستاذ طارق واحنا قاعدين مبسوطين و مرحرحين و مظأطاطين فى القديم ..ده حتى المثل بيقول القديمة تحلى ولو كانت وحلة..".
وتابعت بشرى: "إلا صحيح ما هو التعريف الرسمى للقديم و للحديث فى المعجم الوجيز ؟! أنا شخصيا من مواليد التمانينات .. وأحب القديم قوى ..ده حتى البقال معندوش جبنة جديدة بس عنده جبنة قديمة..".
ووجهت رسالتها لطارق: "كان بالأحرى بالناقد الكبير كتابة نقد موضوعى و عدم اهمال جهود ١٢ ممثل فى الفيلم، و منهم مجموعة من الشباب الواعد، فقط لأن فى أمر مشخصن كما يبدو مع شخص نجم الفيلم.. طب مش عاجبك القديم يا أستاذ طارق فى ٦ وجوه جديدة فى الفيلم، كلهم مش عاجبين حضرتك؟؟؟ ده قرار واعي بتحطيم الشباب بقى ..إذن لا تحدثنى عن الحداثة و تتهمنا بالقدم".
ودافع عدد كبير من الصحفيين عن طارق الشناوي، فكتبت أحدى الصحفيات: "الفنان مصطفى قمر مدين بالاعتذار للأستاذ طارق الشناوي.. اتفق أو اختلف مع آراء طارق الشناوي النقدية، لكن أبدا لا يكون الرد بهذه الطريقة المتطاولة والمهينة.. مفهوم النقد غائب عند غالبية الفنانين مع الأسف الشديد"، وكتب آخر: "الأستاذ طارق الشناوي ناقد محترم وصحفي مخضرم وأكبر من أي تطاول".
